7 ਨਵੰਬਰ ਨੂੰ ਹੋਵੇਗੀ ਵੋਟਿੰਗ ਡੇਅ ਪੰਜਾਬੀਆਂ ਸਮੇਤ ਸਾਰੇ ਵੋਟਰ ਆਨਲਾਈਨ ਲੱਭ ਸਕਣਗੇ ਆਪਣੇ ਨਜ਼ਦੀਕੀ ਵੋਟਿੰਗ ਕੇਂਦਰ
ਆਕਲੈਂਡ (ਜਸਪ੍ਰੀਤ ਸਿੰਘ ਰਾਜਪੁਰਾ) – ਨਿਊਜ਼ੀਲੈਂਡ ਦੀਆਂ 7 ਨਵੰਬਰ 2026 ਨੂੰ ਹੋਣ ਵਾਲੀਆਂ ਆਮ ਚੋਣਾਂ ਲਈ Electoral Commission ਵੱਲੋਂ ਵੋਟਿੰਗ ਕੇਂਦਰਾਂ ਅਤੇ ਅਗਾਊਂ ਵੋਟਿੰਗ ਸਬੰਧੀ ਅਹਿਮ ਜਾਣਕਾਰੀ ਜਾਰੀ ਕੀਤੀ ਗਈ ਹੈ। ਇਸ ਵਾਰ ਚੋਣਾਂ ਵਾਲੇ ਦਿਨ ਦੇਸ਼ ਭਰ ਵਿੱਚ 2,315 ਵੋਟਿੰਗ ਕੇਂਦਰ ਖੁੱਲ੍ਹੇ ਰਹਿਣਗੇ, ਜਦਕਿ ਅਗਾਊਂ ਵੋਟਿੰਗ ਸਮੇਤ ਸਮੁੱਚੇ ਚੋਣ ਸਮੇਂ ਦੌਰਾਨ ਕੁੱਲ 2,638 ਥਾਵਾਂ ‘ਤੇ ਵੋਟ ਪਾਉਣ ਦੀ ਸਹੂਲਤ ਉਪਲਬਧ ਹੋਵੇਗੀ।
Electoral Commission ਮੁਤਾਬਕ ਜਿਹੜੇ ਲੋਕ 7 ਨਵੰਬਰ ਨੂੰ ਕਿਸੇ ਕਾਰਨ ਵੋਟ ਪਾਉਣ ਨਹੀਂ ਜਾ ਸਕਦੇ, ਉਹ 26 ਅਕਤੂਬਰ ਤੋਂ ਸ਼ੁਰੂ ਹੋਣ ਵਾਲੀ Advance Voting ਰਾਹੀਂ ਪਹਿਲਾਂ ਹੀ ਆਪਣੀ ਵੋਟ ਪਾ ਸਕਣਗੇ। ਹਾਲਾਂਕਿ ਵੱਖ-ਵੱਖ ਵੋਟਿੰਗ ਕੇਂਦਰਾਂ ਦੇ ਖੁੱਲ੍ਹਣ ਦੇ ਦਿਨ ਅਤੇ ਸਮੇਂ ਅਲੱਗ ਹੋ ਸਕਦੇ ਹਨ, ਇਸ ਲਈ ਵੋਟਰਾਂ ਨੂੰ ਘਰੋਂ ਨਿਕਲਣ ਤੋਂ ਪਹਿਲਾਂ ਆਪਣੇ ਨਜ਼ਦੀਕੀ ਕੇਂਦਰ ਦਾ ਸਮਾਂ ਜ਼ਰੂਰ ਚੈੱਕ ਕਰਨ ਦੀ ਸਲਾਹ ਦਿੱਤੀ ਗਈ ਹੈ।
ਚੋਣ ਕਮਿਸ਼ਨ ਨੇ ਦੱਸਿਆ ਕਿ ਇਸ ਵਾਰ ਵੋਟਿੰਗ ਕੇਂਦਰ ਅਜਿਹੀਆਂ ਥਾਵਾਂ ‘ਤੇ ਬਣਾਏ ਗਏ ਹਨ, ਜਿੱਥੇ ਲੋਕ ਆਮ ਤੌਰ ‘ਤੇ ਆਪਣੇ ਰੋਜ਼ਾਨਾ ਦੇ ਕੰਮਾਂ ਲਈ ਜਾਂਦੇ ਹਨ। ਇਨ੍ਹਾਂ ਵਿੱਚ ਕਮਿਊਨਿਟੀ ਹਾਲ, ਸਕੂਲ, ਸ਼ਾਪਿੰਗ ਮਾਲ, ਧਾਰਮਿਕ ਸਥਾਨ, ਯੂਨੀਵਰਸਿਟੀਆਂ ਅਤੇ ਹੋਰ ਵਿਦਿਅਕ ਸੰਸਥਾਵਾਂ ਦੇ ਨਾਲ-ਨਾਲ ਮਾਰਾਏ (Marae) ਵੀ ਸ਼ਾਮਲ ਹਨ।
ਇਸ ਵਾਰ ਵੋਟਿੰਗ ਪ੍ਰਬੰਧਾਂ ਵਿੱਚ ਭਾਸ਼ਾਈ ਅਤੇ ਵਿਸ਼ੇਸ਼ ਸਹੂਲਤਾਂ ਦਾ ਵੀ ਵਿਸ਼ੇਸ਼ ਧਿਆਨ ਰੱਖਿਆ ਗਿਆ ਹੈ। ਚੋਣਾਂ ਵਾਲੇ ਦਿਨ ਖੁੱਲ੍ਹਣ ਵਾਲੇ ਕੇਂਦਰਾਂ ਵਿੱਚੋਂ 67 ਕੇਂਦਰ ਅਜਿਹੇ ਹੋਣਗੇ, ਜਿੱਥੇ ਵੋਟਰ ਤੇ ਰੇਓ ਮਾਓਰੀ (te reo Māori) ਜਾਂ ਅੰਗਰੇਜ਼ੀ ਵਿੱਚ ਵੋਟਿੰਗ ਪ੍ਰਕਿਰਿਆ ਪੂਰੀ ਕਰ ਸਕਣਗੇ। ਇਸ ਤੋਂ ਇਲਾਵਾ ਛੇ ਕੇਂਦਰਾਂ ‘ਤੇ Sign Language Interpreters ਦੀ ਸਹੂਲਤ ਹੋਵੇਗੀ।
ਅਪਾਹਜ ਜਾਂ ਸਰੀਰਕ ਤੌਰ ‘ਤੇ ਵਿਸ਼ੇਸ਼ ਸਹਾਇਤਾ ਦੀ ਲੋੜ ਵਾਲੇ ਵੋਟਰਾਂ ਲਈ 1,679 ਵੋਟਿੰਗ ਕੇਂਦਰ ਪੂਰੀ ਤਰ੍ਹਾਂ ਪਹੁੰਚਯੋਗ ਬਣਾਏ ਗਏ ਹਨ। ਤਿੰਨ ਕੇਂਦਰਾਂ ‘ਤੇ Quiet Times ਦੀ ਸਹੂਲਤ ਵੀ ਦਿੱਤੀ ਜਾਵੇਗੀ, ਤਾਂ ਜੋ ਸ਼ਾਂਤ ਮਾਹੌਲ ਦੀ ਲੋੜ ਵਾਲੇ ਲੋਕ ਬਿਨਾਂ ਕਿਸੇ ਪਰੇਸ਼ਾਨੀ ਦੇ ਆਪਣੀ ਵੋਟ ਪਾ ਸਕਣ।
Chief Electoral Officer Karl Le Quesne ਨੇ ਕਿਹਾ ਕਿ ਚੋਣ ਕਮਿਸ਼ਨ ਦੀ ਕੋਸ਼ਿਸ਼ ਹੈ ਕਿ ਵੋਟ ਪਾਉਣਾ ਹਰ ਨਾਗਰਿਕ ਲਈ ਆਸਾਨ ਅਤੇ ਸੁਵਿਧਾਜਨਕ ਬਣਾਇਆ ਜਾਵੇ। ਉਨ੍ਹਾਂ ਮੁਤਾਬਕ ਵੋਟਿੰਗ ਕੇਂਦਰਾਂ ਦੀ ਜਾਣਕਾਰੀ ਆਨਲਾਈਨ ਉਪਲਬਧ ਕਰਵਾਉਣ ਦੇ ਨਾਲ-ਨਾਲ ਸਥਾਨਕ ਸੁਪਰਮਾਰਕੀਟਾਂ ਵਿੱਚ ਵੀ ਨਜ਼ਦੀਕੀ ਕੇਂਦਰਾਂ ਦੀਆਂ ਸੂਚੀਆਂ ਰੱਖੀਆਂ ਜਾਣਗੀਆਂ।
ਜਿਹੜੇ ਵੋਟਰਾਂ ਨੂੰ ਆਪਣੇ ਨਜ਼ਦੀਕੀ ਵੋਟਿੰਗ ਕੇਂਦਰ ਬਾਰੇ ਜਾਣਕਾਰੀ ਨਹੀਂ ਹੈ, ਉਹ Electoral Commission ਦੀ ਅਧਿਕਾਰਤ ਵੈੱਬਸਾਈਟ www.vote.nz ‘ਤੇ ਜਾ ਕੇ ਆਪਣੇ ਇਲਾਕੇ ਦਾ ਵੋਟਿੰਗ ਕੇਂਦਰ ਲੱਭ ਸਕਦੇ ਹਨ। ਇਸ ਤੋਂ ਇਲਾਵਾ ਮੁਫ਼ਤ ਹੈਲਪਲਾਈਨ 0800 36 76 56 ‘ਤੇ ਫ਼ੋਨ ਕਰਕੇ ਵੀ ਜਾਣਕਾਰੀ ਪ੍ਰਾਪਤ ਕੀਤੀ ਜਾ ਸਕਦੀ ਹੈ।
ਚੋਣ ਕਮਿਸ਼ਨ ਨੇ ਇਹ ਵੀ ਸਪੱਸ਼ਟ ਕੀਤਾ ਹੈ ਕਿ ਜਿਹੜੇ ਲੋਕ ਬਿਮਾਰੀ, ਸਰੀਰਕ ਅਸਮਰੱਥਾ ਜਾਂ ਕਿਸੇ ਹੋਰ ਕਾਰਨ ਵੋਟਿੰਗ ਕੇਂਦਰ ਤੱਕ ਨਹੀਂ ਪਹੁੰਚ ਸਕਦੇ, ਉਨ੍ਹਾਂ ਲਈ ਵੋਟ ਪਾਉਣ ਦੇ ਬਦਲਵੇਂ ਪ੍ਰਬੰਧ ਵੀ ਉਪਲਬਧ ਹਨ। ਅਜਿਹੇ ਵੋਟਰ ਹੈਲਪਲਾਈਨ ਨਾਲ ਸੰਪਰਕ ਕਰਕੇ ਆਪਣੀ ਸਥਿਤੀ ਅਨੁਸਾਰ ਸਹਾਇਤਾ ਲੈ ਸਕਦੇ ਹਨ।
ਚੋਣਾਂ ਲਈ ਵੋਟਰ ਰਜਿਸਟ੍ਰੇਸ਼ਨ ਦੀ ਆਖਰੀ ਤਾਰੀਖ 25 ਅਕਤੂਬਰ ਦੱਸੀ ਗਈ ਹੈ, ਜਿਸ ਤੋਂ ਅਗਲੇ ਦਿਨ 26 ਅਕਤੂਬਰ ਨੂੰ Advance Voting ਸ਼ੁਰੂ ਹੋ ਜਾਵੇਗੀ। ਇਸ ਲਈ ਜਿਹੜੇ ਯੋਗ ਨਾਗਰਿਕਾਂ ਨੇ ਅਜੇ ਤੱਕ ਆਪਣੀ ਵੋਟਰ ਰਜਿਸਟ੍ਰੇਸ਼ਨ ਨਹੀਂ ਕਰਵਾਈ, ਉਨ੍ਹਾਂ ਨੂੰ ਨਿਰਧਾਰਤ ਸਮੇਂ ਤੋਂ ਪਹਿਲਾਂ ਆਪਣੀ ਰਜਿਸਟ੍ਰੇਸ਼ਨ ਪੂਰੀ ਕਰਨ ਦੀ ਅਪੀਲ ਕੀਤੀ ਗਈ ਹੈ।
ਨਿਊਜ਼ੀਲੈਂਡ ਵਿੱਚ ਵੱਸਦੇ ਪੰਜਾਬੀ ਭਾਈਚਾਰੇ ਦੇ ਯੋਗ ਵੋਟਰਾਂ ਲਈ ਵੀ ਇਹ ਅਹਿਮ ਮੌਕਾ ਹੈ ਕਿ ਉਹ ਆਪਣੀ ਵੋਟ ਦਾ ਇਸਤੇਮਾਲ ਕਰਕੇ ਦੇਸ਼ ਦੀ ਅਗਲੀ ਸਰਕਾਰ ਚੁਣਨ ਵਿੱਚ ਹਿੱਸਾ ਪਾਉਣ।
ਆਪਣਾ ਨਜ਼ਦੀਕੀ ਵੋਟਿੰਗ ਕੇਂਦਰ ਇੱਥੇ ਲੱਭੋ
ਇਸ ਲਿੰਕ ਤੇ ਕਲਿੱਕ ਕਰੋ ਅਤੇ ਤੁਹਾਨੂੰ ਆਪਣੇ ਵੋਟਿੰਗ ਕੇਦਰ ਦੀ ਜਾਣਕਾਰੀ ਮਿਲੇਗੀ